МОНГОЛ УЛСЫН ЗАХ ЗЭЭЛ Монгол улсын хувьцааны зах зээлийг төлөөлөх ТОП-20 индекс өнгөрөгч 7 хоногт өсөлттэй байлаа. Тодруулбал, Монголын хөрөнгийн биржийн ТОП-20 индекс 42,142.4 нэгжид хүрч, 1.74%-ийн өсөлттэй хаагдлаа. Монгол улс 2024 оны эхний 3 сард нийт 128 улстай худалдаа хийж, гадаад худалдааны нийт бараа эргэлт 6.1 тэрбум ам.долларт хүрсэн байна. Үүнээс экспорт 3.66 тэрбум ам.доллар, импорт 2.41 тэрбум ам.долларт хүрч, тэнцэл ойролцоогоор 1.2 тэрбум ам.долларын ашигтай гарчээ. Экспорт 2024 оны эхний 3 сард өмнөх оны мөн үеэс 107.5 сая ам.доллароор буурсан ба үүнд цайрын хүдэр, баяжмал 74.4 сая ам.доллароор, нүүрс 38.7 сая ам.доллароор, адууны мах 32.6 сая ам.доллароор, лаазалсан махан бүтээгдэхүүн 31.6 сая ам.доллароор тус тус буурсан нь голлон нөлөөлжээ. Харин боловсруулаагүй буюу хагас боловсруулсан алт 57.9 сая ам.доллар, төмрийн хүдэр, баяжмал 36.0 сая ам.доллароор тус тус өссөн байна. Импорт өмнөх оны мөн үеэс 474.7 сая ам.доллароор өсөхөд суудлын автомашин 119.1 сая ам.доллар, дизелийн түлш 76.3 сая ам.доллар, автобензин 52.1 сая ам.доллар, бульдозер, авто хусуур, индүүдэгч, тэгшлэгч, экскаватор 27.8 сая ам.доллар, нийтийн тээврийн хэрэгсэл 25.9 сая ам.доллароор тус тус өссөн нь голлон нөлөөлжээ. Нийт экспортын 60.5%-ийг чулуун нүүрс, 17.4%-ийг зэсийн хүдэр баяжмал, 5.8%-ийг алт эзэлж байна.
АНУ-ЫН ЗАХ ЗЭЭЛ АНУ-ын 2024 оны 3-р сарын инфляцын түвшин жилийн өмнөх үеэс 3.5%, сарын өмнөх үеэс 0.4% тус тус өссөн үзүүлэлттэй гарсан билээ. Үүний дараа Холбооны нөөцийн сангийн тэргүүн Жером Пауэлл инфляцын түвшний дарамт хадгалагдсан хэвээр байгааг онцолж 2024 оны 3-р сард шинэчилсэн бодлого боловсруулагчдын төсөөллийг дагуу бодлогын хүүг эрт бууруулахгүй байх нөхцөл үүсээд байгааг мэдээлсэн юм. Тэрээр хэрэв шаардлагатай бол бодлогын хүүг бууруулахгүйгээр одоогийн түвшинд хадгалсаар байх болно хэмээн өнгөрөгч 7 хоногт мэдэгдсэн. Үүний нөлөө болон Иран, Израил дахь геополитикийн хурцадмал байдал нь АНУ-ын хувьцаануудын ханш өнгөрөгч 7 хоногт уналттай байхад голлон нөлөөллөө. Тус улсын хувьцааны зах зээлийг төлөөлөх S&P 500 индекс гурав дахь 7 хоногоо дараалж уналттай хаагдлаа.
ЕВРОПЫН ЗАХ ЗЭЭЛ Ойрх Дорнодод хурцадмал байдал үүсэж байгаатай холбоотойгоор Европын хувьцааны зах зээлийг төлөөлөх голлох индексүүд өнгөрөгч 7 хоногт уналттай байлаа. Тодруулбал, FTSE 100 индекс 1.25%, STOXX Europe 600 индекс 1.18%-ийн тус тус бууралттай хаагдлаа. 2024 оны 3-р сарын Их Британийн инфляцын түвшин 3.4%-иас 3.2%-д хүрч буурлаа. Уг үзүүлэлт нь сүүлийн 2 жил хагас хугацаан дахь тус улсын хамгийн доод инфляцын түвшин юм. Их Британийн 2024 оны 2-р сарын ажилгүйдлийн түвшин 3.9%-иас 4.2%-д хүрч өслөө.
ЯПОН УЛСЫН ЗАХ ЗЭЭЛ Ойрх Дорнодод хурцадмал байдал үүссэнтэй холбоотойгоор Япон улсын хувьцааны зах зээлийг төлөөлөх голлох индексүүд өнгөрөгч 7 хоногт уналттай байлаа. Тодруулбал, Nikkei 225 индекс 6.21%, TOPIX индекс 4.83%-ийн тус тус уналттай хаагдлаа. Олон улсын валютын зах зээлд Япон улсын иений ханш Баасан гарагт дийлэнх валютуудын эсрэг түр хугацаанд чангарсан боловч эргэн суларч ам.долларын эсрэг сүүлийн 34 жилийн доод түвшиндээ арилжаалагдаж байна. Япон улсын төв банкны ерөнхийлөгч Казүо Уэда нь иений ханшийн сулрал нь инфляцын түвшний өсөлтөд нөлөөлж эхлэх юм бол бодлогын хүүг дахин өсгөх болно хэмээн мэдэгдээд байгаа юм.
БНХАУ-ЫН ЗАХ ЗЭЭЛ БНХАУ-ын 2024 оны эхний улирлын эдийн засгийн өсөлт шинжээчдийн хүлээлтийг давсны улмаас тус улсын хувьцааны зах зээл өнгөрөгч 7 хоногт өсөлттэй байлаа. Тодруулбал, Shanghai Composite индекс 1.52%, CSI 300 индекс 1.89%-ийн тус тус өсөлттэй байлаа. БНХАУ-ын 2024 оны эхний улирлын эдийн засгийн өсөлт жилийн өмнөх үеэс 5.3%, улирлын өмнөх үеэс 1.6% тус тус өссөн үзүүлэлттэй гарлаа. Тус улсын 2024 оны зорилтот эдийн засгийн өсөлт 5.0% юм.
|
Ковид цар тахлын сөрөг шокоос өмнө 1 ам.доллар 103 ширхэг Япон улсын иентэй тэнцдэг байжээ. Харин өнөөдөр 1 ам.доллар 154 иентэй тэнцэж, иений ханш ам.долларын эсрэг 50% орчим суларсан байна. Уг 1 ам.доллар 154 иентэй тэнцэж буй үзүүлэлт нь сүүлийн 34 жилийн хамгийн доод түвшин юм. Тэгвэл Япон улсын зүгээс иений ханшийн сулралын эсрэг ямар байр суурьтай байна вэ? Мөн цаашид ханш хэд хүрэх вэ? гэдэг асуултуудад хариулсан Ти Ди Би Секьюритис ҮЦК-ийн Дилер С.Зоригтын шинжилгээг танилцуулъя.
Юуны өмнө иений ханш ам.долларын эсрэг сулрахад нөлөөлж буй хамгийн гол хүчин зүйл нь Холбооны нөөцийн сан болон Япон улсын төв банкны хоорондын Мөнгөний бодлогын зөрүүтэй байдал юм. Тодруулбал, Холбооны нөөцийн сан 1980 оноос хойших хамгийн хурдацтайгаар бодлогын хүүгээ өсгөж 5.5%-д хүргэсэн байгаа бол Япон улсын төв банк сүүлийн 30 жилийн турш өсөлт үзүүлээгүй эдийн засгийн өсөлтөө дэмжихээр бодлогын хүүгээ сөрөг утгад хадгалж байгаатай холбоотой байна. (Жич: 2024 оны 3-р сард Япон төв банк сүүлийн 17 жилд анх удаа сөрөг хүүгийн түвшнийг эерэг болгосон.)
Хоёр улсад Мөнгөний бодлогын зөрүү үүсгэж буй гол шалтгаан нь улс хоорондын эдийн засаг болон инфляцын нөхцөл байдалтай холбоотой байна. АНУ-ын хувьд өндөр инфляцын түвшнийгээ бууруулж зорилтот 2.0%-д хүргэх нь чухал байна. Харин Япон улсын хувьд бодлогын хүүгээ сөрөг утгад хадгалж, хадгаламж болон зээлийн хүүг маш бага түвшинд барих, зах зээл дэх эрэлтийг дэмжих, мөн улсын экспортын бүтээгдэхүүний дүнг нэмэгдүүлж улмаар эдийн засгийн өсөлтөө дэмжих нь чухал байгаа юм.
Япон улсын бодлого боловсруулагчдын хувьд иений ханшийн сулралын эсрэг валютын зах зээлд интервенц хийх талаар мэдэгдсээр байгаа хэдий ч хамгийн гол суурь хүчин зүйлүүд иений ханш сулрах чиглэлд байна. Тиймээс Япон улсын иений ханш 160, цаашлаад интервенц хийхгүй бол 1 ам.доллар 170 иентэй ч тэнцэх боломжтой гэж үзэж байна.
|
